Friðgeir Einarsson er rithöfundur og sviðslistamaður, búsettur í Reykjavík.

Hann hefur sent frá sér fimm bækur, skáldsögurnar Serótónínendurupptökuhemlar, Formaður húsfélagsins og Stórfiskur, sem og smásagnasöfnin Takk fyrir að láta mig vita og Ég hef séð svona áður.

Friðgeir stundaði nám við leiklistardeild Listaháskóla Íslands. Frá útskrift árið 2008 hefur hann komið að tugum uppfærslna í íslensku atvinnuleikhúsi og starfað með leikhópum á borð við Kriðpleir, Abendshow, 16 elskendur, Mig og vini mína, Shalala og Íslenska dansflokkinn. Hafa verk hans verið sýnd á leiklistarhátíðum beggja vegna Atlantsála. Leikverk Friðgeirs Club Romantica fékk Grímuverðlaun árið 2019 sem besta leikrit, auk þess að vera tilnefnt sem sýning ársins. Þá hefur Friðgeir komið að dagskrárgerð fyrir útvarp og sjónvarp, og var meðal annars einn höfunda áramótaskaupsins 2022.